सीता जयन्ती, २०८२ को शुभकामना

सीता उत्पत्ति दिवस (सीता जयन्ती), २०८२ को पावन अवसरमा स्वदेश तथा विदेशमा रहनु भएका सम्पूर्ण नेपाली दिदीबहिनी तथा दाजुभाइहरुमा हार्दिक शुभकामना व्यक्त गर्दछु ।

माता सीता हिन्दू धर्म र रामायणको प्रमुख पात्रमध्येकी एक हुन । उनलाई आदर्श नारीको प्रतीक मानिन्छ । उनको जीवनलाई त्याग, धैर्य, पवित्रता, समर्पण र साहसको एक अनुपम उदाहरणको रुपमा पनि चित्रण गरेको पाइन्छ । सीताको जन्मलाई दैवीय र चमत्कारिक घटनाको रुपमा लिइन्छ, जसले उनको पवित्रता र आध्यात्मिक महत्वलाई दर्शाउँदछ । यो जयन्तीले रामायणको कथालाई स्मरण गराउँदै धर्म, सत्य र नैतिकताको मार्गमा सदैव अडिग रहनु पर्दछ भन्ने सन्देश दिन्छ । नेपाली संस्कृतिमा नारीको सम्मान, मातृशक्ति र पारिवारिक मूल्यहरुलाई यसले प्रोत्साहन गर्दछ । सीताको जीवनले नारीको साहस, स्वाभिमान र कर्तव्यनिष्ठतालाई उजागर गर्दै समाजमा नारीको भूमिका र महत्वलाई पुनः स्थापित गर्न यो जयन्तीले सबैलाई प्रेरित गर्न सकोस् । समाजमा लैङ्गिक समानता, पारिवारिक सद्भाव र सामाजिक न्यायका लागि अभिप्रेरित गर्ने यो जयन्तीले व्यक्तिलाई आत्मिक शुद्धता, धैर्य र प्रेमको मार्गमा अघि बढ्न सधैं अभिप्रेरित गर्ने विश्वास लिएको छु ।

सीताको जीवनबाट प्राप्त सन्देशहरुलाई आत्मसात गर्दै मानिसलाई कठिन परिस्थितिमा पनि सकारात्मक र धर्मनिष्ठ रहन यो जयन्तीले पुनः स्मरण गराउँदछ । यस अवसरमा माता सीताको पूजा, व्रत र प्रार्थना गर्नाले आध्यात्मिक उन्नति र मनोकामना पूर्ति हुने विश्वास छ ।  यो जयन्ती एउटा धार्मिक पर्व मात्र नभई सामाजिक, सांस्कृतिक र नैतिक मूल्यहरुको संरक्षण र प्रवर्धन गर्ने अवसर पनि हो । नारीको साहस, स्वाभिमान र आत्मनिर्भरताको सन्देश दिने यो जयन्तीले सीताले रावणको चेतावनी र सामाजिक शङ्काहरुको सामना आफ्नो साहसका साथ कसरी गरिन् भन्ने तथ्यलाई अंगिकार गर्दै आधुनिक समाजमा नारी सशक्तीकरणको लागि प्रेरणा पनि प्रदान गर्दछ ।

सीता जयन्ती पारिवारिक र सामाजिक सद्भाव कायम राख्ने सन्देशबाट ओतप्रोत छ । सीताको जीवनले पति–पत्नीको प्रेम, पारिवारिक एकता र कर्तव्यप्रतिको समर्पणलाई जोड दिन्छ । परिवार र समाजमा आपसी समझदारी र सहयोगको भावना अभिवृद्धि गर्नमा पनि यो जयन्तीले मद्दत पुग्ने विश्वास लिएको छु । सीताको त्याग र धैर्यले व्यक्तिलाई पारिवारिक जिम्मेवारी र सामाजिक दायित्वप्रति सचेत गराउन सघाउँदछ। यो जयन्तीले हामीलाई नैतिक र आध्यात्मिक शिक्षाको महत्व बुझ्न अभिप्रेरित पनि गर्दछ । 

 

सीताको चरित्रले सत्य, धर्म र नैतिकताको पाठ सिकाउँदै उनको जीवनको कठिन परिस्थितिमा पनि धैर्य र विश्वास कायम राख्न प्रेरित गर्दछ । यो जयन्तीले युवा पुस्तालाई रामायणका आदर्शहरु र नैतिक मूल्यहरुको स्मरण गराउन सहयोग पनि गर्दछ । सांस्कृतिक संरक्षण र वातावरणीय सन्देश समेत बोकेको यो जयन्तीले  नेपाली संस्कृति र परम्परालाई जीवन्त बनाई राख्न सहयोग पुग्दछ । पृथ्वीको छोरीका रुपमा सीताले प्रकृतिप्रति गहिरो सम्बन्धलाई दर्शाउँछिन् । यसले वातावरण संरक्षण र प्रकृतिप्रतिको सम्मानको सन्देश दिन्छ । सीताको जीवनलाई आधुनिक सन्दर्भमा लैङ्गिक समानता, नारी स्वतन्त्रता र सामाजिक न्यायको दृष्टिकोणबाट हेर्दा उनको स्वाभिमान र आत्मनिर्णय आजको समाजका लागि उत्तिकै प्रासङ्गिक छ । यो जयन्तीलाई सामाजिक कुरीति र लैङ्गिक भेद्भावविरुद्ध सचेतना फैलाउने अवसरका रुप लिन सक्नुपर्दछ ।

यो जयन्तीलाई माता सीताको पवित्र जीवन र मातृशक्तिको महिमालाई स्मरण गर्ने अवसरका रुपमा लिँदै नारी सशक्तिकरण, पारिवारिक सद्भाव, नैतिक शिक्षा र सांस्कृतिक संरक्षणका लागि महत्वपूर्ण कडीका रुपमा उपयोग गर्न सक्नुपर्दछ । मातृशक्तिको रुपमा सीताले सृजन, संरक्षण, साहस र स्वाभिमानका लागि दिएको सन्देशहरुलाई आत्मसात गर्न र लैङ्गिक समानता र सामाजिक न्यायको लागि क्रियाशील हुने अवसरका रुपमा लिन सके मात्र यो जयन्ती मनाउनुको सार्थकता पुष्टि हुनसक्छ ।

अन्त्यमा, सीता जयन्तीको यो पावन अवसरमा माता सीताको आदर्शबाट प्रेरित भई हामी सबै सत्य, धर्म र प्रेमको मार्गमा अघि बढौं। यो जयन्तीलाई परिवार र समाजमा विद्यमान सबैखाले आपसी कलह, द्वेष, क्लेश, दुःख र अशान्ति समाप्तिका लागि प्रतिबद्धता व्यक्त गर्ने अवसरका रुपमा लिँदै नारीमाथि हुने शोषण, हिंसा र विभेद्को अन्त्यका लागि यो जयन्तीले सबैलाई उत्प्रेरित गर्न सकोस् । सभ्य, शान्त, समुन्नत र समृद्ध समाज निर्माणमा दृढ संकल्पका साथ अघि बढने हौसला प्राप्त होस् भन्ने विश्वासका साथ पुनः सीता जयन्तीको हार्दिक शुभकामना व्यक्त गर्दछु । 

धन्यवाद ।

२०८२ वैशाख २३ गते मङ्गलबार ।

ने.सं. ११४५ वछलाथ्व, नवमी ।

 

Download / View