सम्माननीय उपराष्ट्रपति श्री नन्दबहादुर पुन 'पासाङ्ग'ज्यूबाट तमू (गुरुङ) समुदायको महान् पर्व तमू ल्होछार/ल्होसारको शुभ अवसरमा दिनुभएको

शुभकामना सन्देश

तमू (गुरुङ) समुदायको महान् चाड तमू ल्होछार/ल्होसार २०७८ को पावन अवसरमा स्वदेश तथा विदेशमा रहनुभएका सम्पूर्ण तमू दिदीबहिनी तथा दाजुभाइहरुमा सुख, शान्ति, सु-स्वास्थ्य, समृद्धि एवम् राष्ट्रको निरन्तर उन्नतीका लागि हार्दिक मंगलमय शुभकामना व्यक्त गर्दछु । 

नेपाल बहुजातीय, बहुभाषिक, बहुधार्मिक, बहुसांस्कृतिक एवम् भौगोलिक विविधतायुक्त धर्मनिरपेक्ष राष्ट्र हो । अनेकौं संस्कृति, सम्पदा, सभ्यता र समुदायको सुन्दर, सप्तरंगी सम्मिश्रण एवं साझा संगमको रुपमा रहीआएको नेपाल सामाजिक सद्भाव र सौहार्दताका लागि संसारभर सुपरिचित छ । नेपालका सबै समुदायका आ-आफ्नै मौलिक पहिचानसहितका भाषा, धर्म, संस्कार, संस्कृति र धार्मिक एवम् सांस्कृतिक चाडपर्व छन् । विभिन्न समुदायमा मौलिकताका साथ मनाइने चाडपर्वहरु नेपालीको साझा चाडपर्व बनेका छन् । 

पुराना वर्ग (वर्ष) को विदाई र नयाँ वर्गलाई स्वागत गर्दै तमू (गुरुङ) समुदायले मनाउने तमू ल्होछार/ल्होसार पनि फराकिलो हुँदै आमनेपालीको पर्वको रुपमा स्थापित हुँदै गएको छ । गाई वर्गको विदाई र बाघ वर्गको स्वागत गर्दै मनाइने यो वर्षको ल्होछार/ल्होसार देशको मौलिक संस्कृतिको संरक्षण, प्रवर्द्धन गर्नुका साथै राजनीतिक स्थायित्व, दिगो विकास, संविधानको पालन र प्रत्येक नेपाली जनताको आर्थिक सामाजिक रुपान्तरणसहितको समुन्नत र समृद्ध नेपाल निर्माणमा सबैलौ प्रेरणा दिने विश्वास लिएको छु । 

विश्वव्यापी महामारी कोरोना भाइरस (कोभिड-१९)को जोखिम कायम रहेको भन्ने विज्ञहरुको सुझावलाई ध्यान दिंदै स्वाथ्य सुरक्षा मापदण्डको पूर्ण पालना गरेर ल्होछार/ल्होसार मनाउन म सम्पूर्ण तमु दिदीबहिनी तथा दाजुभाईहरुलाई अनुरोध गर्दछु ।

तमू ल्होछार/ल्होसार २०७८ को हार्दिक शुभकामना ।

धन्यवाद ।

१५ पुस २०७८