सम्माननीय उपराष्ट्रपति श्री नन्दबहादुर पुन 'पासाङ्ग'ज्यूबाट ईसाई धर्मावलम्बीहरुको पर्व क्रिसमस डेको अवसरमा दिनुभएको

शुभकामना सन्देश

ईसाई धर्मावलम्बीहरुको महान् पर्व क्रिसमस डेको अवसरमा स्वदेश तथा विदेशमा रहनुभएका सम्पूर्ण ईसाई धर्मावलम्बी नेपाली दिदीबहिनी तथा दाजुभाइहरुमा सुख, शान्ति, समृद्धि सु-स्वास्थ्य, दीर्घायू एवम् उत्तरोत्तर प्रगतिको हार्दिक शुभकामना व्यक्त गर्दछु । 

धर्मनिरपेक्ष राष्ट्र नेपाल बहुजातीय, बहुभाषिक, बहुधार्मिक, बहसांस्कृतिक एवम् भौगोलिक विविधतायुक्त मुलुक हो । हाम्रा मौलिक धार्मिक एवम् सांस्कृतिक चाडपर्वहरुले सामाजिक एकता, सद्भाव, धार्मिक सहिष्णुता कायम राख्दै राष्ट्रिय एकतालाई अझै मजबुत बनाउन महत्वपूर्ण योगदान दिंदै आएका छन् । यस पावन पर्वले सम्पूर्ण नेपालीहरुका बीच आपासी सद्भाव, सामाजिक एकता र भातृत्व कायम गर्ने अपेक्षा लिएको छु ।

पछिल्लो समय धार्मिक तथा सांस्कृतिक चाड पर्व मनाउने क्रममा विकृति पनि देखा पर्न थालेका छन् । विकृतिलाई रोक्दै भड्कीलो हुन नदिन र कमभन्दा कम खर्चमा चाड पर्व मनाउन म सबैमा अनुरोध पनि गर्दछु । 

विश्वमा पुनः फैलिरहेको विश्वव्यापी महामारी कोरोना भाइरस (कोभिड-१९) नेपालमा पनि थप फैलन सक्ने विज्ञहरुले चेतावनी दिइरहेका छन् । विज्ञहरुको सुझावलाई ध्यान दिन र स्वास्थ्य मापदण्डको पूर्ण पालना गरेर मात्रै क्रिसमस मनाउन म आग्रह गर्दछु । स्वाथ्य भन्दा ठूलो अरु केही नहुने कुरालाई ध्यान दिएर आउने चाडपर्वहरु मनाउन म सबै धार्मिक, जातीय, सांस्कृतिक, भाषिक समूदायका दिदीबहिनी तथा दाजुभाइहरुलाई अनुरोध गर्दछु ।

क्रिसमस डेको शुभकामना ।

धन्यवाद ।

१० पुस २०७८