सम्माननीय उपराष्ट्रपति श्री नन्दबहादुर पुन 'पासाङ्ग'ज्यूबाट २०७८ सालको तिहारको अवसरमा दिनुभएको

शुभकामना सन्देश

उज्यालो र उल्लासको पर्वको रुपमा मनाइने नेपालीहरुको महान् चाड तिहारको अवसरमा देश तथा विदेशमा रहनुभएका सम्पूर्ण नेपाली दिदीबहिनी तथा दाजुभाइहरुमा सुख, शान्ति, समृद्धि, सु-स्वास्थ्य एवम् उत्तरोत्तर प्रगतिको साथै मुलुकको समृद्धिका लागि हार्दिक मंगलमय शुभकामना व्यक्त गर्दछु । 

बहुजातीय, बहुभाषिक, बहुधार्मिक, बहुसांस्कृतिक र भौगोलिक विविधताले भरिपूर्ण हाम्रो देश विविध धर्म, संस्कार संस्कृतिले अत्यन्त धनी छ । विविधतायुक्त धर्म, संस्कार संस्कृतिले हाम्रो राष्ट्रिय एकतालाई मजबुत बनाउँदै आएका छन् । महान् चाड तिहारले नेपालीहरुकाबीच आपसी सद्भाव, सहिष्णुता, भाइचारा र एकता अभिवृद्धि गर्दै राष्ट्रिय एकतालाई थप बलियो बनाउनेमा विश्वस्त छु । 

जनताको लामो संघर्षपछि देशमा गणतन्त्र, संघीयता, धर्मनिरपेक्षता र सामाजिक न्यायसहितको समानुपातिक समावेशी शासन व्यवस्था राजनीतिक परिवर्तनहरु प्राप्त भएका छन् । यी परिवर्तनहरुलाई संविधानले संस्थागत गरेसँगै देश स्थायी शान्ति, दिगो विकास, राजनीतिक स्थायित्व र प्रत्येक नेपाली जनताको आर्थिक सामाजिक रुपान्तरणसहितको समुन्नती र समृद्धिको मार्गमा छ । उज्यालो र उल्लासको पर्व तिहारले संविधानको पूर्ण पालनसँगै राजनीतिक स्थायित्व, दिगो विकास, राष्ट्रिय एकता, आर्थिक सामाजिक रुपान्तरणसहितको समृद्ध राष्ट्र निर्माणका लागि सबै नेपालीलाई उर्जा थप्ने विश्वास लिएको छु । 

हाम्रा मौलिक चाड पर्वहरु नेपाली संस्कृतिको रुपमा विकास भइरहेका छन् । नेपालका सबै खाले चाड पर्वहरुको संरक्षण र संवर्द्धन गर्नु हामी सबैको दायित्व हो । तर, पछिल्ला समय चाड पर्व मनाउने क्रममा विकृतिहरु पनि देखा पर्न थालेका छन् । हाम्रा चाड पर्वमा आइरहेका विकृतिहरुलाई रोक्दै र भइरहेका केहीं परम्परागत अन्धविश्वास हटाउँदै चाड पर्वको मौलिकता जोगाउनेतर्फ सबैले ध्यान दिनुपर्दछ ।

तिहारको शुभकामना ।

धन्यवाद ।

२० कात्तिक २०७८