ईद–उल–फित्रको शुभकामना

इस्लाम धर्मावलम्बीहरुको महान पर्व 'ईद–उल–फित्र' को अवसरमा स्वदेश तथा विदेशमा रहनु भएका सम्पूर्ण नेपाली इस्लाम धर्मावलम्बी दिदीबहिनी तथा दाजुभाइहरुमा सुख, शान्ति, समृद्धि र सुस्वास्थ्यका लागि हार्दिक शुभकामना व्यक्त गर्दछु ।

इस्लाम धर्मावलम्बीहरुले यो पर्व हर्षोल्लासका साथ मनाउने परम्परा रही आएको छ । यस अवसरमा आयोजना हुने परम्परागत ‘इफ्तार’ र रोजा पश्चात नमाज पढेपछि साँझपख विशेष परिकार सहितको खाद्यवस्तु ग्रहण गर्नु इस्लाम धर्मावलम्बीहरुको महत्वपूर्ण अनुष्ठान हो । यी अनुष्ठानका माध्यमबाट इस्लाम धर्मावलम्बीहरुले आफ्नो ध्यान र आत्मसंयममा वृद्धि गर्ने प्रयास गर्नुले उहाँहरुको आध्यात्मिकतालाई थप बलियो बनाउन सघाउँदछ ।

नयाँ–नयाँ कपडा लगाउने, नमाज पढ्ने, एक अर्कासंग गला मिलाउँदै बधाई, शुभकामना र उपहारहरु साटासाट गरी मनाइने ‘ईद–उल–फित्र’ का दिन विशेष परिकारहरु बनाएर खाने र खुवाउने परम्परा पनि छ । ईदको चन्द्रमा हेरेपछि सबैलाई ‘चाँद मुबारक’ वा ‘ईद मुबारक’ भन्ने चलन छ । साथै, मानिसहरु आफ्नो श्रद्धा अनुसार कमाएको रकममध्ये केही हिस्सा दान दिने परम्पराले यो पर्वको महत्व झनै बढाएको विश्वास व्यक्त गर्दछु ।

भाइचारा, मेलमिलाप र सामूहिकतामा एकताको प्रतीकका रुपमा रहेको 'ईद–उल–फित्र' ले सबैलाई एकआपसमा मिलेर बस्न सन्देश दिनुको साथै असहाय, गरीब र सहयोगको आवश्यकता रहेकाहरुलाई मद्दत गर्न समेत उत्प्रेरित गर्दछ । जीवनमा आशा र विश्वासको सन्देश दिँदै सत्यनिष्ठ, कर्मनिष्ठ र कर्तव्यनिष्ठ बन्न पनि यो पर्वले सिकाउँदछ ।

 

मानवता मानिसको मूल धर्म हो, यसको संरक्षण आवश्यक छ । धर्मको यो मूल मर्मको उपासना, आत्मसात र अंगिकार सबै मानव जातिले गर्न सक्नुपर्दछ । तब मात्रै विश्वमा शान्ति कायम भई सिंगो मानव प्रजातिको उन्नति र प्रगति सम्भव हुन सक्दछ । धर्मले समता, स्वतन्त्रता, बन्धुत्व, न्याय आदिको पृष्ठपोषणमा टेवा पुग्दछ । यसले मानिसमा आध्यात्मिक रुपान्तरण गर्दै एउटा सभ्य र सुसंस्कृत मानव बन्नमा सघाउँदछ । एउटा विकसित, सुखद र सम्पन्न व्यवस्था प्रणाली एवं सभ्यताको निर्माणमा यी विषयहरु अपरिहार्य हुन्छ । यसका लागि उन्नत दृष्टिकोण र देशभक्ति भाव उत्तिकै आवश्यक छ ।  

कुनैपनि धर्मले सबैखाले विभेद्को अन्त्य र नकारात्मक भावलाई निषेध गरेको छ । धर्मको उद्देश्य त्याग, मन, वचन र कर्मको पवित्रता, अहिंसा, लोकहित, बुद्धि र विवेकबाट निर्धारित कर्ममार्गको महत्वलाई स्थापित गर्नु पनि हो । सुन्दर समन्वय र पवित्राचरणबाटै मानिस सत्यमार्ग र सु–कर्ममार्गमा हिड्न सक्दछ । विपत्तिमा धर्म विषयक आस्थाको परीक्षा हुने गर्दछ । विनम्रवाणी, समर्पण र सहयोगको भावनाले कुनैपनि धर्मप्रतिको आस्था र विश्वासलाई पृष्ठपोषण गर्दछ  । सत्कर्म, सद्मार्ग, सदाचार, सद्भाव, समभाव, सद्गुण र समन्वय कुनैपनि धर्मका लागि निर्विवाद एवं निर्विकल्प सूत्र हुन् । यसैबाट देश र समाजको उन्नत्ति सम्भव छ ।

अन्त्यमा, 'ईद–उल–फित्र' ले राष्ट्रिय एकता र सांस्कृतिक ऐक्यवद्धताको भावना सबल र सुदृद्ध गर्दै सभ्य, शान्त, समुन्नत र समृद्ध समाज निर्माणमा थप प्रेरणा प्रदान गर्न सकोस् । संघीय लोकतान्त्रिक गणतन्त्र, सामाजिक न्याय, स्वाधीनता, राष्ट्रिय एकता, अखण्डता र राष्ट्रियतालाई थप बलियो एवं सुदृद्ध बनाउन यो पर्वले सबैलाई प्रेरित गर्ने विश्वासका साथ पुन : हार्दिक शुभकामना व्यक्त गर्दछु ।

धन्यवाद ।

२०८१ चैत १८ गते सोमबार ।

ने.सं. ११४५ चौलाथ्व द्वितीया ।

 

Download / View