नयाँ वर्ष २०७८ को अवसरमा सम्माननीय उपराष्ट्रपति श्री नन्दबहादुर पुन 'पासाङ्ग'ज्यूले दिनुभएको
शुभ-कामना
आज विक्रम् संवत् २०७८ वैशाख १, अर्थात नयाँ वर्ष शुभारम्भको दिन । नयाँ वर्ष-२०७८ शुभारम्भको पावन अवसरमा देश-विदेशमा रहनुभएका समस्त नेपाली दिदीबहिनी तथा दाजुभाइहरुमा सुख, शान्ति, सु-स्वास्थ्य, उत्तरोत्तर प्रगति एवम् राष्ट्रको निरन्तर समुन्नती र समृद्धिका लागि हार्दिक शुभकामना व्यक्त गर्दछु ।
वि. सं. २०७८ शुभारम्भसँगै हामीले वि. सं. २०७७ लाई विदाई गरेका छौं । बितेको वर्ष हाम्रा लागि सुखद रहन सकेन । विश्वव्यापी महामारी कोरोना भाइरस (कोभिड-१९) रोकथाम तथा नियन्त्रणका लागि गरिएको लकडाउन (बन्दाबन्दी)बीच स्वागत गरिएको २०७७ साल भरी हामीले महामारीको असर भोगिरह्यौँ । अर्थतन्त्रका सबै क्षेत्रमा महामारीको असर पर्दा गत आर्थिक वर्षको आर्थिक वृद्धिदर ऋणात्मक बन्न पुग्यो । महामारीकै कारण लाखौं लाख विद्यार्थीहरुले विद्यालयको कक्षा कोठामा पुग्न पाएनन् । यसै समयमा देशको राजनीतिक अवस्था संकटपूर्ण अवस्थामा पुगेर लयमा फर्कियो । तमाम कारणले वि.सं. २०७७ उत्साह र उमंगको वर्ष हुन सकेन ।
बन्दाबन्दीबीच घरभित्रै रहेर २०७७ लाई स्वागत गर्दै गर्दा हाम्रो आशा र विश्वास थियो २०७८ लाई हर्षोल्लासका साथ स्वागत गर्नेछौं । हाम्रो अपेक्षा विपरित २०७८ लाई स्वागत गर्दै गर्दा देशमा कोरोना भाइरसको दोस्रो लहर तीव्ररुपमा फैलिरहेको छ । जस्तोसुकै प्रतिकुलता, कठिन परिस्थिति र पीडामा पनि मुस्कुराउन सक्ने हामी नेपालीको विशेषता हो । विषम परिस्थितिका बीच हाम्रो घर आँगनमा आइपुगेको नयाँ वर्ष स्वास्थ्य सुरक्षाको मापदण्डलाई पूर्णरुपमा पालना गरेर हर्षका साथ मनाउनु हुन म सम्पूर्ण दिदीबहिनी तथा दाजुभाइहरुमा आग्रह गर्दछु ।
हामीले नेपालमा कोरोना भाइरसको पहिलो लहरलाई जसरी नियन्त्रण गर्न सफल भयौँ, दोस्रो लहरलाई पनि अवश्य नियन्त्रण गर्नेछौं । नयाँ वर्ष २०७८ शुभारम्भको अवसरले कोरोना भाइरसको दोस्रो लहर नियन्त्रणका लागि सबै तहका सरकार, चिकित्सक तथा स्वास्थ्यकर्मी, सुरक्षाकर्मी र सम्पूर्ण नेपालीहरुलाई उर्जा प्रदान गरोस् भन्ने कामना गर्दछु । कोराना भाइरसको महामारी नेपालमा चाँडै नियन्त्रण हुने र प्रतिकुलताको बीच पनि देश ‘समृद्ध नेपाल, सुखी नेपाली’को राष्ट्रिय आकांक्षा पूरा गर्न निरन्तर अगाडि बढिरहने विश्वास लिएको छु ।
नयाँ वर्ष २०७८ को सबैमा शुभकामना ।
धन्यवाद ।
१ वैशाख २०७८