सम्माननीय उपराष्ट्रपति श्री नन्द बहादुर पुन 'पासाङ्ग'ज्यूबाट प्रजातन्त्र दिवस २०७८ को अवसरमा दिनुभएको

शुभकामना सन्देश

ऐतिहासिक जनआन्दोलनमार्फत् सार्वभौम नेपाली जनताले निरंकुश राणा शासन ढालेर प्रजातन्त्र स्थापना गरेको गौरवपूर्ण र अविस्मरणीय दिन प्रजातन्त्र दिवस-२०७८ को अवसरमा सम्पूर्ण नेपाली दिदी-बहिनी तथा दाजुभाइहरुमा हार्दिक बधाई तथा शुभकामना व्यक्त गर्दछु । प्रजातन्त्र प्राप्तीका लागि भएको आन्दोलनमा आफ्नो जीवनको आहूती दिनुहुने महान वीर वीरंगनाहरुलाई स्मरण गर्दै यस अवसरमा उहाँहरुप्रति श्रद्धासुमन अर्पण गर्दछु ।

प्रजातन्त्र प्राप्तीपछि पनि नेपाली जनताले विभिन्न कालखण्डमा ऐतिहासिक जनआन्दोलन तथा सशस्त्र संघर्ष गर्नुपर्‍यो । विभिन्न कालखण्डमा भएका सशस्त्र संघर्ष, जनआन्दोलन, जनयुद्ध र २०६२/६३ को ऐतिहासिक जनआन्दोलनबाट प्राप्त भएको गणतन्त्र, संघीयता, धर्मनिरपेक्षता, सामाजिक न्यायसहितको समानुपातिक समावेशी शासन व्यवस्था लगायतका राजनीतिक उपब्धीहरुलाई संविधानले संस्थागत गरिसकेको छ । यी उपलब्धीहरुको संरक्षण र रक्षामा हामी सबैले जोड दिनुपर्दछ ।

प्रजातन्त्र दिवस-२०७८ ले देशको भौगोलिक अखण्डता, राष्ट्रिय स्वाधिनता र नेपाली जनताको स्वतन्त्रतालाई अझै सुदृढ् गर्दै देशलाई विकास र समृद्धिको मार्गमा अगाडि बढ्न प्रेरणा दिने अपेक्षा लिएको छु । प्रजातन्त्र दिवसको शुभकमना । 

धन्यवाद ।

७ फागुन २०७८