सम्माननीय उपराष्ट्रपति श्री नन्दबहादुर पुन 'पासाङ्ग'ज्यूबाट होली पर्व २०७८ को अवसरमा दिनुभएको
शुभकामना सन्देश
रंगहरुका पर्वको रुपमा मनाइने नेपालीहरुको लोकप्रिय चाड यस वर्षको फागु पूर्णिमा (होली पर्व) आइपुगेको छ । काठमाडौं उपत्यकासहित पहाडी तथा हिमाली क्षेत्रमा फागु पूर्णिमाको दिन र तराई मधेसमा भोलिपल्ट भव्य रुपमा मनाइने रंगहरुको पर्व होली पर्व-२०७८ को पावन अवसरमा सम्पूर्ण नेपाली दिदीबहिनी तथा दाजुभाइहरुमा सुख, शान्ति, सद्भाव, समृद्धि र निरन्तर प्रगतिको हार्दिक शुभकामना व्यक्त गर्दछु ।
बहुजातीय, बहुभाषिक, बहुधार्मिक, बहुसांस्कृतिक तथा भौगोलिक विविधतायुक्त राष्ट्रका हामी नेपाली भाषा, कला, संस्कृतिले अत्यन्त धनी छौँ । शरद ऋतुबाट वसन्त ऋतु आगमनको सुखद् समयमा आउने होली पर्वले सप्तरंगी जस्तै रंगिन नेपाली समाजलाई एक सूत्रमा जोडेर आपसी सद्भाव, सहिष्णुता, प्रेम र भाइचाराको अभिवृद्धि गर्दै राष्ट्रिय एकतालाई बलियो बनाउँदै आएको छ । यस वर्षको होली पर्वले सामाजिक सद्भाव थप फैलाउने र राष्ट्रिय एकतालाई बलियो बनाउने विश्वास लिएको छु ।
संघीय लोकतान्त्रिक गणतन्त्र नेपालको आधारभूत सरकार स्थानीय तहको निर्वाचन नजिकिएको छ । प्रत्यक्ष मतदानद्वारा आफ्नो सरकार आफै बनाउने स्थानीय तहको निर्वाचनलाई उत्सवको रुपमा लिन र सक्रिय सहभागीता जनाउन म सबै दिदीबहिनी तथा दाजुभाइहरुलाई आग्रह गर्दछु । होली पर्व २०७८ ले स्थानीय तहको निर्वाचनलाई उत्सवको रुपमा सम्पन्न गर्न सबैलाई प्रेरणा प्रदान गरोस् -होली पर्वको हार्दिक शुभकामना ।
धन्यवाद ।
३ चैत २०७८