सम्माननीय उपराष्ट्रपति नन्दबहादुर पुन  'पासाङ्ग'ज्यूबाट छठ पर्व २०७८ को अवसरमा दिनुभएको

शुभकामना सन्देश

छठ-२०७८ को पावन अवसरमा सम्पूर्ण नेपाली दिदीबहिनी तथा दाजुभाइहरुमा हार्दिक शुभकामना व्यक्त गर्दछु । 

बहुजातीय, बहुभाषिक, बहुधार्मिक, बहुसांस्कृतिक एवम् भौगोलिक विविधताले भरिपूर्ण धर्मनिरपेक्ष हाम्रो देश विविध धर्म, संस्कार र संस्कृतिले समृद्ध छ । विविधतायुक्त हाम्रा संस्कार संस्कृतिले राष्ट्रिय एकतालाई सुदृढ् समेत गर्दै आएका छन् । 

विशेष गरी तराई क्षेत्रमा अस्ताउँदो र उदाउँदो सूर्यको पूजा गरी मनाइने सूर्य उपासना परम्पराको मोहक पद्धति मानिएको छठ संसारकै मौलिक पर्व हो । पारिवारिक कल्याण, सन्तान सुख तथा मनोकामना पूरा हुने विश्वासका साथ मनाइने छठ पर्वले नेपालीहरुकाबीच आपसी सद्भाव, सहिष्णुता, भाइचारा र एकता अभिवृद्धि गर्दै राष्ट्रिय एकतालाई थप सुदृढ् गर्नेमा म विश्वस्त छु । 

विश्वव्यापी महामारी कोराना भाइरस (कोभिड-१९) को जोखिम अझै कायमै रहेकाले स्वास्थ्य सुरक्षाको नियम पूर्ण पालना गरी छठ मनाउन आग्रह गर्दछु । 

छठ पर्वको शुभकामना ।

धन्यवाद ।

२४ कात्तिक २०७८