सम्माननीय उपराष्ट्रपति श्री रामसहाय प्रसाद यादवज्यूले राष्ट्रिय प्रजातन्त्र दिवस, २०८२ को अवसरमा दिनुभएको शुभकामना सन्देश

राष्ट्रिय प्रजातन्त्र दिवस,२०८२ को शुभकामना सन्देश

राष्ट्रिय प्रजातन्त्र दिवस, २०८२ को अवसरमा स्वदेश तथा विदेशमा रहनु भएका सम्पूर्ण नेपाली दिदीबहिनी तथा दाजुभाइहरुमा सुख, शान्ति, समृद्धि र उत्तरोत्तर प्रगतिका लागि हार्दिक शुभकामना व्यक्त गर्दछु ।

१०४ वर्ष लामो जहानियाँ निरङ्कुश शासनविरुद्ध जनताले गरेको बलिदानीपूर्ण संघर्षकै परिणामस्वरूप २००७ सालमा प्राप्त ऐतिहासिक उपलब्धिको स्मरणमा हरेक वर्ष फागुन ७ गते प्रजातन्त्र दिवस मनाइन्छ । यो दिवसले सहिदहरुको अमूल्य योगदान, स्वतन्त्रताको महत्व र राष्ट्रिय एकताको सन्देशलाई पुनः उजागर गर्दछ । हाम्रा अग्रजहरुको त्याग र दृढ संकल्पकै कारण आज हामी संघीय लोकतान्त्रिक गणतन्त्र नेपालको नागरिक हौं । यस अवसरमा हामी सबैले मुलुकलाई द्रुत गतिमा विकास, समृद्धि र सामाजिक सद्भावतर्फ अघि बढाउने संकल्प लिनुपर्दछ ।

प्रजातन्त्र दिवसले नागरिक अधिकारको रक्षा, समान अवसरको सुनिश्चितता, सामाजिक न्यायमा आधारित समतामूलक समाजको निर्माण र संघीय लोकतान्त्रिक गणतन्त्रलाई सबल बनाउन हाम्रो जिम्मेवारीलाई पनि स्मरण गराउँछ । लोकतन्त्र, शासन प्रणाली मात्र नभई सामाजिक मूल्य, सांस्कृतिक आदर्श र नैतिक आचारसंहिताको आधार पनि हो । यसले जाति, धर्म, भाषा, लिङ्ग वा वर्गका आधारमा कुनै भेदभाव स्वीकार गर्दैन । आर्थिक समानता र सामाजिक न्यायसहितको लोकतन्त्रले मात्र राष्ट्रलाई स्थायी शान्ति र समृद्धितर्फ डो¥याउन सक्छ ।

आजको दिनले हामीलाई संविधानमा निहित संघीयता, समावेशिता, समानुपातिक प्रतिनिधित्व र कानूनी राज्यलाई अक्षुण्ण राख्दै गरीबी, अशिक्षा, बेरोजगारी र विभेद अन्त्य गर्ने दिशामा एकजुट भएर अघि बढ्न प्रेरित गर्दछ । लोकतन्त्रलाई बलियो बनाउन राजनीतिक दल, नेतृत्व र नागरिक सबैले आदर्श आचरण, सकारात्मक सोच र जिम्मेवारपूर्ण व्यवहारलाई आत्मसात् गर्न आवश्यक छ ।

अन्त्यमा, प्रजातन्त्र स्थापनार्थ विभिन्न कालखण्डमा भएका ऐतिहासिक जन आन्दोलन, सशस्त्र संघर्ष, मधेश विद्रोह, आदिवासी जनजाति आन्दोलन लगायतमा जीवन आहुति दिने महान सहिदहरुप्रति भावपूर्ण श्रद्धाञ्जली अर्पण गर्दछु । लोकतान्त्रिक मूल्य र आदर्शलाई जोगाउँदै प्रजातन्त्र दिवसले संविधानको पूर्ण पालन गर्दै मुलुकमा शान्ति, विकास, स्थिरता, संघीय लोकतान्त्रिक गणतन्त्रात्मक शासन व्यवस्थाको सफल कार्यान्वयन र जनजीवनमा गुणात्मक सुधार ल्याउने प्रेरणा प्रदान गरोस् भन्ने हार्दिक शुभकामना व्यक्त गर्दछु ।

जय नेपाल !

धन्यवाद !

२०८२ फागुन ७ गते बिहीबार ।

ने.सं. ११४६ चिल्लाथ्व, द्वितीया ।